Siglir tar il cuntegn

Header

cuntegn

Furmla 1 Sebastian Vettel da la pole-position

Betg Lewis Hamilton u Veltteri Bottas – pia in dals dus pilots da Mercedes – partan questa saira da la pole-position al grond premi da la furmla 1 dal Canada a Montreal, mabain Sebastian Vettel en il Ferrari. La sonda saira a chaschun da la qualificaziun ha Vettel prendì davent la pole-position da Lewis Hamilton, che parta oz da la posiziun dus.

Levgiament per l'entir team

Vettel è uschia suenter bunamain in onn puspè ina giada stà il svelt en la qualificaziun. E ses plaschair è immens. Er sch'igl è be l'emprim plaz en la qualificaziun, per Vettel e ses entir team è quai in levgiament, suenter che la stagiun actuala n'è fin uss betg propi gartegiada. Ferrari è stà senza schanza cunter Mercedes ch'ha gudagnà tut las sis cursas da questa stagiun e tschintg da quellas giadas schizunt pudì festivar ina victoria dubla.

Sper Vettel ha er ses collega da team, Charles Leclerc, mussà la sonda ina buna prestaziun en la qualificaziun. El parta questa saira da la posiziun 3. Sin posiziun quatter suonda Daniel Ricciardo en il Renault. Valtteri Bottas ch'ha gia gudagnà il 2019 dus gronds premis parta sin plaz 6. Il duel intern tranter ils dus pilots dal team Alfa Romeo ha per ina giada Antonio Giovinazzi gudagnà. Il Talian parta da la posiziun 13 e ses collega da team, Kimi Räikkönen, da la posiziun 17.

Partenza per il grond premi dal Canada a Montreal è questa dumengia saira a las 20:10.

RR Sportissimo 12:00

Artitgels legids il pli savens