Siglir tar il cuntegn

Header

video
Gianluca Cologna
Or da Actualitad dals 23.03.2018.
laschar ir. Durada: 2 minutas 36 Secundas.
cuntegn

Naziunal/Internaziunal Gianluca Cologna terminescha la carriera da passlung

Il passlunghist svizzer banduna la loipa e cumenza in studi.

Gianluca Cologna, il frar giuven dal quatterdubel campiun olimpic Dario Cologna, di adia al passlung, quai en la vegliadetgna da be 27 onns. Quai ha Swiss Ski communitgà a l’ur da las cursas dals campiunadis svizzers a Steg en il Principadi da Liechtenstein.

audio
Saira: Gianluca Cologna finescha sia carriera
ord Sportissimo dals 24.03.2018.
laschar ir. Durada: 10 minutas 11 Secundas.

Sfurzà a questa decisiun hajan en emprima lingia las blessuras dals davos bun trais onns. Plinavant haja el era pers in zic il plaschair e la motivaziun da cuntinuar cun il sport da prestaziun ha Gianluca Cologna confermà ad RTR. El haja ussa decidì da pender ils skis vid la paraid e cumenzar cun in studi.

Diplom olimpic a Sotschi

Enfin il 2010 è Gianluca Cologna sa participà a cursas da juniors. Il debut en la cuppa mundiala ha il Jauer dà il 2010 a Tavau, quai en il sprint – sia disciplina da parada.

En sia carriera è Gianluca Cologna stà ina giada sin il podest da la cuppa mundiala. Il 2013 è el vegnì terz en il sprint ad Asiago en l’Italia. Sper ils dus titels da campiun svizzer, il 2011 cun la staffetta a Les Mosses ed il 2013 en il sprint a Sedrun, èn franc ils gieus olimpics il 2014 a Sotschi stads in dals puncts culminants da sia carriera. Ensemen cun ses frar Dario avevan els cuntanschì il 5avel plaz en il sprint d’equipa ed uschia gudagnà in diplom olimpic.

RR novitads 13:00

Artitgels legids il pli savens