Siglir tar il cuntegn
Inhalt

Gieus olimpics a Pyeongchang IOC resta dir: 15 Russas e Russ èn sclaus da Pyeongchang

Il comité olimpic internaziunal resta dir en il scandal da doping: 15 atletas ed atlets da la Russia na dastgan betg sa participar als gieus olimpics a Pyeongchang en la Corea dal sid.

Purtret da Thomas Bach
Legenda: Il president dal comité olimpic internaziunal Thomas Bach tar ina conferenza da medias avant ils gieus olimpics. Keystone

13 atlets e 2 trenaders na dastgan betg ir a Pyeongchang als gieus olimpics d'enviern. Tenor il comité olimpic internaziunal han els fatg part al sistem da doping ch'era vegnì a la glisch suenter ils gieus olimpics a Sotchi (2014).

Quai ha decidì ina cumissiun independenta, schegea che la dretgira internaziunala da sport aveva anc annullà in scumond per l'entira vita da questas ed ulteriuras persunas. Tranter ils atlets russ èn nums prominents sco per exempel ils olimpionics Alexander Legkov (passlung) ed Alexander Tretjakow (skeleton).

Gia oravant aveva la cumissiun decidì che 169 atletas ed atlets russ dastgan sa participar als gieus olimpics che cumenzan venderdi a Pyeongchang en la Corea dil sid. Quai però cun bandiera neutrala, senza imni e sco «atlets olimpics da la Russia».

RR novitads 06:00