Dentant dastgian intgins atlets russ sa participar als gieus a Pyeongchang, quai sut la bandiera olimpica. Quai ha decidì l'executiva dal IOC il mardi a Losanna. Ils atlets e las atletas ston pudair mussar si ch'els èn sa participads a tests independents. In tal sistem dovra gia la Federaziun internaziunala da l’atletica leva.
Recurs anc pussaivel
Per vita duranta exclus da gieus olimpics ha il IOC il vice-primminister russ Vitali Mutko. Quel è ditg stà responsabel per il sport russ. La Russia po uss anc far in recurs tar il Tribunal internaziunal dal sport CAS.
In entir sistem statal
Il Comité olimpic internaziunal sentenziescha uschia il doping en la Russia, che succeda tenor el a moda sistematica ed organisada dal stadi. Tar ils gieus olimpics d’enviern a Sotschi avant quatter onns ha quai sistem funcziunà il pli intensiv. Cun agid dal servetsch secret han ins barattà ora numerusas provas da doping da sportists russ. Fin uss han duas cumissiuns dal IOC exclus per vita duranta 25 participants da Sotschi.
RR novitads 20:00