Siglir tar il cuntegn

Naziunal/Internaziunal Giger Samuel gudogna la lutga sin la Schwägalp

A la festa da lutga sin la Schwägalp ha il turgoves e favurit Samuel Giger (20 onns) gudagnà cunter Daniel Bösch, il victur dal Unspunnen 2011.

Samuel Giger gudogna la festa da lutga tradiziunala sin la Schwägalp. Il Turgoves ha 20 onns ed ha bittà en il resgim Daniel Bösch dal Son Gagl en la lutga finala. Per Giger è quai la segunda giada ch'el gudogna la lutga sin la Schwägalp. Il 2016 aveva Giger gudagnà cun tuttina blers puncts sco Armon Orlik – però cun meglier andament a la lutga.

Duel pli lung che spetgà

Il duel tranter Samuel Giger (cun 6 victorias questa stagiun) e Daniel Bösch (victur da l'Unspunnen 2011) ha durà pli ditg. En la 9avla da maximal 12 minutas ha Giger fatg il «schlantsch curt» decisiv. Uschia ha Giger gudagnà tut las 6 festas da cranz ch'el ha fatg part. Las ulteriuras festas da cranz ha'l stuì dar forfait pervi da pausas da blessuras.

Avant aveva Giger gudagnà il «duel grond» cun Christian Stucki – il victur da l'ultima lutga d'Unspunnen. Giger è bain stà 3 giadas en perfetg. La finala ha'l però pudì gudagnar cun l'emprima attatga seriusa.

Dals lutgaders grischuns n'han cuntanschì nagins ils rangs da cranz. En la rangaziun finala , il link avra en ina nova fanestraè Ursin Battaglia (14g) avant Marc Jörger (22b) e Mike Peng (22d).

Il Grischun Armon Orlik ha mancà, perquai ch'el n'è anc betg sa revegnì da la blessura al schanugl. Sper el han mancà era ils retgs da lutga Matthias Glarner e Matthias Sempach. Glarner n'è betg anc sa revegnì da la crudada da la gondla (zercladur 2017) e Sempach ha problems cun il dies ed è sa retratg.

Festa da lutga sin la Schwägalp

Festa da lutga sin la Schwägalp

La festa da lutga sin la Schwägalp è la fin ed il punct culminant da la stagiun da las festas da cranzs. Al pè dal Säntis vegni a l’inscunter dals megliers lutgaders da la stagiun. Ils megliers lutgaders da las 3 meglieras uniuns da lutga cumbattan per cranz e titel.

RR novitads 17:00+