Siglir tar il cuntegn

Header

cuntegn

Naziunal/Internaziunal Giugaders dal HCD suan stad ed enviern

Malgrà ch’i è mesa stad, n’èsi nagin temp da vacanzas per il Club da hockey da Tavau. Il HCD è vid trenar di per di en vista a la nova stagiun 2016/2017.

Durant ils mais da stad treneschan ils hockeyans dal HCD oravant tut forza e cundiziun. Quai è la finala la basa per avair success l’enviern sin il glatsch. Trenà vegn era savens giuadora cun differents trenaders da fitness. Quels emprovan era adina da far trenaments variants per uschia motivar anc pli fitg ils giugaders. Forza vegn trenà sin da tuttas modas: per exempel cun auzar paisas, trair ballas da medischina in a l’auter u schizunt cun auzar burras en il guaud.

L’attatgader dal HCD, Dino Wieser
Legenda: L’attatgader dal HCD, Dino Wieser RTR, Andreas Wieland
Jau sun bler pli gugent en halla che giuadora sin la pista d’atletica leva. Jau sa senta simplamain bler meglier sin il glatsch.
Autur: Dino Wieser attatgader HCD

Sa chapescha vegn er trenà durant ils mais da stad sin il glatsch, quai ch’ils giugaders fan per gronda part il pli gugent. Là vegnan els per il pli trenads dal schef, il trenader principal Arno del Curto. Il mument vegn trenà l’avantmezdi durant bun duas uras forza e cundiziun. Suenter gentar datti lura in trenament dad ina fin duas uras sin il glatsch.

audio
Mezdi: Trenament da stad dal HCD
ord Actualitad dals 27.07.2016.
laschar ir. Durada: 3 minutas 27 Secundas.

3 gieus da test las proximas emnas

Venderdis, ils 29 da fanadur, dat il Club da hockey da Tavau ses emprim gieu da test en vista a la nova stagiun. Il HCD frunta a Herisau sin Barys Astana, in club da renum da la KHL. Dumengia, ils 31 da fanadur, dat l’equipa d’Arno del Curto in segund gieu da test encunter quell’equipa, lura il suentermezdi a las 16:00 uras a Tavau. La gievgia, ils 11 d’avust a las 19:00 uras, dat il HCD anc in terz e davos gieu da test. Quel è lura en la halla da glatsch Gurlaina a Scuol encunter ils ZSC Lions, ch’èn ensemen cun Tavau onn per onn in dals candidats sin il titel da campiun svizzer.

Il campiunadi svizzer da hockey sin glatsch cumenza l’entschatta settember. Il Club da hockey da Tavau dat ses emprim gieu ils 09-09-2016 ordaifer encunter il HC Ambri-Piotta.

Artitgels legids il pli savens