Il SC Berna ha reagì sin la terrada dad 1:7 il mardi a Tavau. Il club da la chapitala ha mussà tut in’autra fatscha avant ils fans da chasa e gudagnà meritadamain. Procurà per la decisiun ha Tristan Scherwey ch’ha tutgà en la davosa minuta da la prolungaziun al 3:2. Scherwey ha dentant er profità, ch’il defensur dal HCD Beat Forster è ì en venter en il pli tup mument.
Berna cun bleras schanzas
Il SCB avess gì pliras schanzas da decider il gieu en il temp regular. Tut en tut han ils Bernais sajettà passa 50 sajets sin il gol dal HCD. Il goli Leonardo Genoni ha dentant tegnì Tavau en il gieu. En la 6avla minuta da la prolungaziun ha Genoni plinavant tegnì in penalti da Simon Bodenmann. E trais giadas han ils Bernais tutgà be la pitga u la latta. A la fin ai tuttina anc dà ina buna fin per ils Bernais.
Squitsch da gudagnar
Vul il HCD salvar la schanza da defender il titel da campiun svizzer, sto l’equipa d’Arno del Curto uss gudagnar 3 gieus en seria encunter Berna. Il proxmi gieu da questa seria da mezfinal è sonda saira a Tavau.
Genevra egualisescha la seria
En il quart gieu dal mezfinal tranter Lugano e Genevra ha per la 4. giada il club d'ordaifer gudagnà. Genevra batta ils Bianconeris en in gieu tissientà cun 6:1, en la seria statti uschia 2:2. Pervi da las bleras patangadas han ils arbiters dà en tut 125 minutas chastis.
Bienna en avantatg en il playout
Cun la victoria da 3:0 a chasa cunter ils SCL Tigers maina il EHC Bienna en la seria dal final playout cun 2:1. Uss dovra Bienna anc duas victorias per pudair restar en la liga naziunala A.