Suenter ch'ils ZSC Lions avevan sajettà il 1:0 al cumenzament dal segund terz, ha il nov giugader dal HCD, il Canadais Tyler Redenbach, pudì egualisar. Il gol decisiv al 2:1 han ils Lions alura sajettà en la 50avla minuta.
Per il giugader da Tavau Jan von Arx datti 2 raschuns per la terrada, d'ina vart hajan els laschà ora memia bia schanzas, e da l'autra vart hajan els laschà als Lions memia bler plaz avant il gol.
Il proxim gieu dat il HCD sonda saira ordaifer cunter ils Kloten Flyers.
Ils resultats da las ulteriuras partidas:
Ambri - Zug 2:1
Lakers - Kloten 5:2
Losanna - Bienna 3:2 suenter sajettar penaltis
Lugano - Berna 3:1
Fribourg - Genevra 5:4 suenter sajettar penaltis