Pers quest classicher ha il HCD surtut en l'emprim terz nua ch'ins ha giugà flaivel. Il Team Canada ha cler dominà las emprimas 20 minutas cun 17 sajets sin il gol ed è ì en avantatg cun 1:0. E curt suenter l'emprima pausa han ils Canadais fatg il 2:0. A la fin dal segund terz èsi gartegià a Thierry Bader da scursanir sin 1:2. Malgrà ch'ils da Tavau han chattà adina meglier en il gieu n'èsi betg reussì d'egualisar ed ir en la prolungaziun.
Il classicher da la Cuppa Spengler
Ch'ils da Tavau perdan encunter il Team Canada en la Cuppa Spengler è nagut da nov. L'ultima giada ch'ils Grischuns èn ids sco victur giu dal plaz è stà l'onn 2014. Lura han ins battì il Team Canada cun 2:1. Dapi lura è il classicher adina ì a favur dals Canadais.
Per Tavau cuntinuescha la Cuppa Spengler gievgia saira. Lura encunter ils Ice Tigers da Nürnberg.
Metallurg Magnitogorsk gudogna suenter penaltis
En l'emprim gieu da da la Cuppa Spengler è Oceláři Třinec, il vice-campiun da la liga en la Tschechia fruntà sin Metallurg Magnitogorsk, ina da las meglras equipas da la KHL. Il gieu è vegnì decidì en la lutga da penaltis cun il resultat final dad 1:2.
La partida da partenza tranter las duas fermas squadras da la Cuppa Spengler è stada plain tempo, dentant n'hai strusch dà gols. Ils dus golis han lura er dominà il gieu. Fin la 53avla minuta ha manà la squadra tscheca Oceláři Třinec la partida cun 1:0. Lura ha Maksim Matuschkin pudì sajettar il gol d'egualisaziun per Metallurg Magnitogorsk. En la lutga da penaltis è sulet il Russ Roman Ljubimow reussì da sajettar in gol.
Cuppa Spengler 2018
RR novitads 18:00++