Cun Yannick Frehner è crudà en egl in giugader che n'ha strusch giugà ina rolla tar il HCD. L'attatgader da 21 onns n'era en las emprimas rundas betg participà als 15 gols dal HCD. Oz è el stà il matchwinner. Duas giadas (3./25.) ha el mantegnì la gnerva persul avant il goli dals giasts, Noël Bader.
Per il HCD va a fin uschia ina stagiun main gartegiada. Almain ha l'equipa da Harijs Witolinsch pudì impedir il «worst case», ils gieus da relegaziun.
EVZ emprim finalist
En ils playoffs ha l'EV Zug cuntanschì sco emprima equipa il final. A chasa ha Zug gudagnà cleramain cunter Losanna cun 5:2. L'equipa da la Svizra centrala gudogna uschia la seria da mezfinal cun 4:1 e stat per la tschintgavla giada en l'istorgia dal club en il final. Zug è stà l'ultima giada il 1998 campiun svizzer.
Berna cun il dies cunter la paraid
L'adversari da Zug n'è anc betg enconuschent. Berna ha pers a chasa cunter Bienna cun 0:2 ed è uss bravamain sut squitsch. En questa seria maina Bienna cun 3:2. I pudess pia dar ch'i dat per l'emprima giada dapi 20 onns in campiun svizzer da hockey che n'è betg il HCD, l'SCB, Lugano u il ZSC.
RR novitads 23:00