Il club da hockey da Tavau na vul mai pli passentar ina stagiun sco la davosa. La fin finala ha l’equipa stuì dar las partidas da final da playout encunter Rapperswil-Jona. Quella seria ha il HCD gudagnà. Speras è dentant bler ì fauss la davosa stagiun. Per l’emprima giada dapi il return da l’equipa grischuna l’onn 1993 en la pli auta liga da hockey naziunala ha la squadra stuì dar il playout.
Nov staff da trenaders, novs giugaders
Suenter la stagiun vargada ha il club engaschà in nov staff da trenaders cun l’engiadinais Christian Wohlwend a la testa. Dasperas ha il HCD era dad integrar circa ina deschina novs giugaders. Tranter auter ha l’equipa era engaschà cun Sandro Aeschlimann da Zug in nov goli.
Las emprimas otg partidas ordaifer
Pervia da las lavurs da renovaziun ed engrondiment dal stadion da hockey a Tavau ha l’equipa da dar las emprimas otg partidas dal nov campiunadi ordaifer. Pir la mesadad dad october turna l’equipa puspè sin l'agen glatsch e po alura mussar als agens fans co la squadra è sa transfurmada cumpareglià cun la stagiun passada. Che l’equipa ha da dar las emprimas partidas sco osp en autras hallas n'è dentant betg in problem. Tant pli grond vegn ad esser il plaschair da savair dar alura davant la culissa dals agens fans.
RR actualitad 17:00