En sia carriera activa sco skiunz alpin ha Heini Hemmi gudagnà quatter cursas da la cuppa mundiala en la disciplina slalom gigant. Plinavant èsi reussì 9 ulteriuras giadas ad el da far il pass sin il podest. Dentant l'entschatta da sia carriera na gieva betg tut sco quai ch'el leva.
Davent dal «Sturzenegger» tar il campiun olimpic
Il skiunz da Churwalden vegniva ditg numnà «Sturzenegger», perquai ch'el gieva en gronds ristgs e crudava uschia or bler en la segunda cursa dal slalom gigant. En l'onn 1976 ha el alura savì metter ses potenzial en omaduas cursas dal slalom gigant sin pista – e quai gist tar ils gieus olimpics. Suenter l'emprim percurs anc terz, ha el mussà in formidabel segund percurs ed è daventà ils 10 da favrer 1976 campiun olimpic a Puntina.
Avant che jau sun ì il segund percurs era Ingemar Stenmark ì da la pista giuador, ed i era ina caneruna. Jau hai savì, uss è quel explodì. Lura vai jau ditg a mi: so, uss morder, morder, morder... e la fin finala èsi gartegià.
Dal campiun olimpic tar il vendider da salmun
Cun 30 onns ha Hemmi gia prendì cumià dal sport professiunal. L'onn 1984 ha el alura fundà la firma Heval, ina fatschenta che venda tranter auter raits da segirtad u pitgas da slalom. Las cursas da skis èn pia er stadas preschentas en la vita suenter la carriera da Heini Hemmi.
Sper la naiv ha dentant era l'aua fascinà l'um che stat uss a Valbella. Gia durant ses temps sco skiunz activ ha el entschet ad ir a pestga. Quella activitad ha accumpagnà el dapi lura ed uschia maina el uss ina stizun a Valbella da vender peschs, pli exact salmuns. Uschia va el er adina puspè ad Alaska a pestga ed importa il salmun ord la medema regiun en Svizra.
RR actualitad 17:00