Claudio Cadonau è naschì e creschì si a Turitg. Sco quai che ses num tradescha dentant, ha il hockeyan ragischs a Vuorz en Surselva. Claudio Cadonau ha emprendì l’amulain da hockey en l’organisaziun dals ZSC Lions e cun l’equipa da Turitg ha il defensur era festegià ses pli gronds success.
L’onn 2008 è el vegnì campiun svizzer cun ils ZSC Lions ed in onn suenter ha Cadonau era gudagnà la Champions Hockey League cun il «Zett» – quella giada anc cun Sean Simpson a la banda, cun Ari Sulander en il gol e cun Matthias Seger sco ina da las pitgas impurtantas da l’equipa.
Suenter ils emprims success il pass en liga B
Cun il titel da campiun svizzer e da la Champions Hockey League ha Claudio Cadonau giugà l’emprim tar ils GCK Lions, suenter era tar Thurgau e Langenthal en la liga naziunala B. Sin la stagiun 2013/2014 è il defensur dentant puspè turnà en liga naziunala A tar Bienna. L’emprima stagiun puspè enavos en la meglra liga da hockey en Svizra è dentant stada greva. Bienna ha stuì ir sur la qualificaziun da la liga per restar en la pli auta liga.
Da Langnau tar il EV Zug
Ils davos dus onns ha Claudio Cadonau giugà tar Langnau. Il defensur cun ragischs en Surselva ha dà tut las partidas en il dress da Langnau. La stagiun passada era partidas da playoff. Quest onn avess l’equipa stuì ir en ils playouts.
Pervia dal coronavirus è la stagiun dentant ida a fin dad in di sin l’auter e Claudio Cadonau na ha gnanca pudì prender cumià da ses anteriurs collegas d’equipa. In a revair datti lura sche tut va bain il settember, cura ch'il nov campiunadi da hockey cumenza puspè e cura ch'il defensur po turnar en il dress da l'EV Zug en la halla da glatsch «Ilfis» a Langnau.