En l'emprim terz han omaduas equipas gì difficultads da chattar en il gieu - suenter la pausa d'ina emna. Pir en il segund terz ha l'equipa da Christian Wohlwend gì enta maun la partida. Dario Meyer ed Andres Ambühl han sajettà il HCD meritadamain cun 2:0 en avantatg.
En l'ultim terz ha Tavau controllà al cumenzament il gieu. En la 50avla minuta han ils Lakers scursanì in zic ord il nagut. Suenter quest gol ha Rapperswil smatgà sin il 2:2, quai dentant senza success. Fabrice Herzog ha lura sajettà il 3:1 per il HCD, suenter ina fitg bella acziun singula. Il 2:3 ord vista dals Lakers, 30 secundas avant la fin, è mo pli stà cosmetica.
Blers gieus senza pausa
La fasa avant la pausa da l'equipa naziunala è stada intensiva per il HCD. Ils blers gieus han ins era sentì tar l'equipa da Christian Wohlwend. La levezza en il gieu ha savens mancà. Uschia era en il final da la Cuppa Svizra cunter Ajoie, nua che Tavau ha pers cun 3:7.
RTR novitads 16:00++