Per il HCD èsi la 5avla victoria en seria. Mo suenter che Tavau aveva anc gudagnà l’emprim duel cun Losanna la fin settember suveran cun 7:1 ha l’equipa da Christian Wohlwend stuì tremblar questa giada in bun tant dapli enfin che la victoria è stada sut tetg.
4 gols en gnanc set minutas
Procurà per la differenza en in gieu pulit intensiv cun blers chastis han quatter gols dal HCD entaifer strusch set minutas en il segund terz. Suenter che Losanna è ì en la 25avla minuta cun 1:0 en avantatg entras in gol dal topscorer Christoph Bertschy en powerplay, ha il HCD reagì cun quatter gols.
L’emprim ha Benjamin Baumgartner egualisà al 1:1, lura ha Lukas Stoop manà l’equipa da chasa cun 2:1 en avantatg, quai cun in sajet davent da la lingia blaua, e silsuenter ha l’American Aaron Palushaj procurà cun ses dus gols per in avantatg confortabel da 4:1. Anc en il segund terz ha Losanna dentant pudì scursanir al 2:4 entras Joël Vermin.
E cura che Vermin ha tutgà per la segunda giada al 3:4 al cumenzament dal davos terz è la tensiun stada enavos en la halla da glatsch a Tavau. Il HCD è dentant vegnì da tegnair il resultat avant radund 5’000 fans ed uschia festivar in’ulteriura victoria, la quarta en il quart gieu da chasa cun la victoria en l’otgavel final da la Cuppa Svizra encunter Lugano.
Ulteriurs resultats:
- Ambri-Piotta – ZSC Lions 2:3
- Lugano – Bienna 1:2
- SCL Tigers – Lakers 4:1
- Berna – Zug 4:5 suenter prolungaziuna
Hockey tabella liga naziunala A
| gieus | gols | puncts | ||
| 1. | Zug | 49 | 146:120 | 90 |
| 2. | ZSC Lions | 49 | 162:123 | 88 |
| 3. | Tavau | 49 | 154:139 | 86 |
| 4. | Genevra | 49 | 134:115 | 86 |
| 5. | Bienna | 49 | 149:140 | 78 |
| 6. | Friburg | 49 | 121:130 | 73 |
| 7. | Losanna | 49 | 133:129 | 72 |
| 8. | Lugano | 49 | 124:135 | 69 |
| 9. | Berna | 49 | 129:139 | 68 |
| 10. | Ambri | 49 | 116:135 | 60 |
| 11. | SCL Tigers | 49 | 113:146 | 60 |
| 12. | Lakers | 49 | 126:156 | 52 |
RR novitads 22:00
