Arno Del Curto è stà dal 1996 - 2018 il trenader dal Club da Hockey da Tavau. Durant quest temp ha el gudagnà sis giadas il campiunadi svizzer. Plinavant ha el triumfà cun l'equipa trais giadas a la Cuppa Spengler. Il cumenzament dal 2019 ha l'Engiadinais anc trenà intgins mais ils ZSC Lions. Suenter quest intermezzo èsi dentant vegnì ruassaivel enturn l'um da 63 onns.
«Trenader na vegn'jeu segir betg pli»
Ad SRF ha el dà ina da las intervistas raras e raquintà cun tge projects ch'el s'occupa actualmain. Tranter auter saja el vid scriver in cudesch, quai dovria dentant bler temp. Plinavant fetschia el era ina scolaziun per daventar in speaker.
Sco trenader vegnian ins betg pli ad vesair el, ha Arno Del Curto ditg en l'intervista. Forsa vegnia el a sa gidar sch'insatgi dovria ina giada agid. Per exempel ad in schef da sport u en in cussegl d'administraziun. Ma cun il job sco trenader haja el serrà gì. «Forsa ina funcziun sco trenader-assistent» possia el dentant tuttina anc s'imaginar da surpigliar in di.
