Matthias Hüppi e Bernhard Russi chalan da commentar cursas da skis. Il slalom dals Campiunadi mundials a San Murezzan vegn ad esser lur davosa cursa ch'els rapportan communablamain a la televisiun svizra. Quai han Hüppi e Russi ditg a la conferenza da medias dad SRF.
Il december 1985 ha il duo commentà per l'emprima giada communablamain ina cursa, la cursa rapida a Gröden. Avant ha Russi gia commentà ensemen cun Karl Erb, Arthur Hächler e Hans Jucker.
Vinavant en funcziun per SRF
Hüppi e Russi vegnan dentant er vinavant a star a disposiziun ad SRF. L'anteriur skiunz vegnia punctualmain ad esser en funcziun sco expert. Hüppi resta moderatur da las emissiuns «sportpanorama» e «sportaktuell», sco er dad ulteriuras emissiuns directas.
Stefan Hofmänner cumplettescha en l'avegnir la squadra da commentaturs da cursas da skis tar SRF.
RR novitads 15:00