Siglir tar il cuntegn
cuntegn

Naziunal/Internaziunal I vegn stretg – gia uss 10'000 annunzias per maraton

Trais mais avant la 51avla ediziun èn gia passa 10'000 passlunghistas e passlunghists s'annunziads – quai èn dubel uschè blers sco anc avant in onn dal medem temp, scrivan ils organisaturs dal Maraton da skis engiadinais la mesemna.

Legenda: Tadlar il audio Gia 10'000 curridurs han s'annunziads per il maraton da skis engiadinais - ils motivs. Durada 03:10 minutas.
03:10 min, Actualitad dals 07.12.2018.

Nov mais suenter l'ediziun da giubileum annunzian ils organisaturs dal Maraton da skis engiadinais puspè in record: Uss, trais mais avant maraton, èn s'annunziads dapli passlunghistas e passlunghists che mai. Ils organisaturs hajan actualmain pli che 10'000 annunzias per la 51vala ediziun da la cursa als 10 da mars 2019.

Sco gia l'onn passà vulan ils organisaturs perquai limitar la cifra da curriduras e curridurs sin 14'200.

Be uschè pudain nus garantir la qualitad usitada.
Autur: Menduri Kaspermanader da gestiun, Engadin Skimarathon

La limita è per Menduri Kasper in dals motivs per las bleras annunzias. Quels ch'hajan stuì desister l'onn passà hajan pli probabel s'annunziads pli baud. En pli hajan els avert la plattafurma d'annunziar gia il di dal 50avel maraton e betg pir la stad.

Da nov part dal «Visma Ski Classics»

En pli fa il Maraton da skis engiadinais part da nov a a la seria dal «Visma Ski Classics». Cun quai s'augmentia l'attenziun per l'emissiun da televisiun sin il livel naziunal e surtut er internaziunal.

La Visma Ski Classics va il 2018/2019 en sia novavla stagiun. La seria da cursas en tecnica classica cumpiglia cursas sco il Vasaloppet, Birkebeiner u la Marcialonga ed uss er il Maraton da skis engiadinais. Las cursas vegnian mussadas en pli che 70 pajais ed hajan in public da passa 20 milliuns, scrivan ils organisaturs da la Visma Ski Classics sin lur pagina en la rait.

RR novitads 17:00