Siglir tar il cuntegn

Header

Il HCD sa legra dal 1:0 tras Dino Wieser.
Legenda: Il HCD sa legra dal 1:0 tras Dino Wieser. Keystone
cuntegn

Naziunal/Internaziunal Il HCD gudogna cun 4:1 e stat en il mezfinal

Il club da hockey da Tavau gudogna la partida cunter ils Kloten Flyers e cuntanscha uschia il mez-final dals playoffs. Tavau gudognan la seria cun quatter victorias senza ina sconfitta.

Suenter la victoria stretga en l'ultima partida han ils Flyers stuì pruvar da far tut il pussaivel per impedir ch'ils Grischuns serran gia suenter quest gieu il satg. Quai n'è dentant betg gartegià. Il HCD gudogna era il quart gieu da la seria cun 4:1.

HCD gia baud en avantatg

Gia suenter set minutas ha Dino Wieser tratg il 1:0 per il HCD. Malgrà il pitschen avantatg n'ha Kloten mai propi gì la schanza da pudair manar il gieu. En la 32avla minuta ha lura Marc Wieser tratg il 2:0. Suenter ha sulet il HCD giugà. Als Kloten Flyers n'è quai betg gartegià da daventar privlus avant il gol da Tavau. Surprendent han ils turitgais lura tratg, trais minutas avant la fin, il 1:2. Lura è il gieu puspè daventà pli interessant. Curt avant la fin han Dino Wieser e Perttu Lindgren decidì il gieu cun dus gols en il gol vid.

Tavau, Berna e Lugano gia en il mez-final

In grond success è la qualificaziun cunzunt per Lugano. Dapi il 2006 n'han ils tessinais betg pli pudì gudagnar ina seria da playoffs. Pia èn els ussa uschè datiers dal titel da campiun Svizzer sco dapi diesch ons betg pli. Tavau frunta en il mezfinal sin Berna, Lugano sin il victur da la seria tranter Genevra e Friburg.

Genevra na vegn betg da decider la seria

Friburg era stà per l'emprima giada pli ferm en ils gieus da playoff che Genevra. Friburg gudogna a chasa il quart gieu cun 3:0. Uschè stat i ussa en la seria 3:1 per Genevra. La proxima schanza per Genevra da sa qualifitgar per il mezfinal è proxima sonda a chasa.

Quart gieu da 1/4 final Playoffs NLA

Partida
Resultat
Seria
Kloten - Tavau
1:4 ( 0:1 0:1 1:2 )
0:4
Lugano - Zug
5:4 ( 1:2 3:1 1:1 )4:0
Berna - ZSC Lions
3:0 ( 1:0 1:0 1:0 )4:0
Friburg - Genevra
3:0 ( 0:0 2:0 1:0 )1:3

RTR/cs/gmm/md