Siglir tar il cuntegn
cuntegn

Naziunal/Internaziunal Il HCD ha manchentà il final

Tavau n’è betg stà effizient avunda per cuntanscher il final da la Cuppa Spengler.

Giugaders da hockey celebreschan in gol
Legenda: Gia en la terza minuta han ils Finnlandais da KalPa sajettà l'emprim gol. Keystone

Cunter ils Finnlandais da KalPa Kuopio han ils Grischuns incassà ina terrada dad 1:2. Uschia vegni da Silvester al final tranter la surpraisa dal turnier, KalPa Kuopio ed il favurit, il Team Canada.

Lez ha battì en ses mezfinal ils Ice Tigers da Nürnberg cun 4:2. Sch’il favurit gudogna è il Team Canada il sulet victur da record da la Cuppa Spengler. Fin ussa parta Canada quest titel cun il HCD. Domaduas equipas han gia gudagnà 15 giadas la Cuppa Spengler.

Il favurit è l’emprim finalist – Team Canada vs. Ice Tigers 4:2

Ils Canadais avevan gia giugà avant dus dis cunter ils Ice Tigers – ed il gieu ha parì da sa repeter. Entant ch'ils Ice Tigers èn stads buns da bittar ils Russ da Metallurg or dal turnier, è sa midada oz la situaziun per els:

  • En l’emprim terz èn las structuras stadas gia suenter radund 9 minutas relativamain cleras: Ils Canadais han immediat fatg squitsch e realisà 2 gols. Per ils Ice Tigers in cumenzament pauc bun – e suenter il 3:0 tar 12’45” è l'impressiun, che la partida saja gia decisa, magari sa derasada.
  • Suenter il 4:0 en il segund terz han ils Canadais fatg damain squitsch ed han cumenzà a giugar main disciplinà. Las emoziuns èn idas in zic pli ad aut cun ina u l’autra pitgada pitschna – ed a Nürnberg èsi gartegià da far il 4:1.
  • En il terz terz ha empruvà il Team Canada dad economisar sias forzas. Ina situaziun ch’ils Ice Tigers han anc pudì nizzegiar per scursanir tschintg minutas avant la fin al 4:2 – e lura è l’emprim finalist da la Cuppa Spengler stà cler: il Team Canada.
Canadais s'allegran sin il glatsch.
Legenda: Il favurit è l’emprim finalist: Il Team Canada declassescha ils Ice Tigers 4:2. Keystone

Be avant dus dis avevan il Team Canada ed ils Ice Tigers gia giugà ina partida a la Cuppa Spengler. Quella era ida a fin cun ina veritabla schleppa per ils Tudestgs: 6:2 era il resultat final cunter il Team Canada, ch’aveva segirà uschia da maniera suverana sia plazza en il mezfinal.

Oz han ils Ice Tigers da Nürnberg bain fatg ina meglra figura ch’en l’emprim gieu cunter ils Canadais, ma i n'ha betg bastì.

Tuttina han fatg ils Ice Tigers da Nürnberg ina buna impressiun tar lur emprima preschientscha a la Cuppa Spengler. Na l'ultim cun quai ch'els avevan procurà sonda per la surpraisa perfetga e bittà ils stars russ da Magnitogorsk cun 3:1 or dal turnier.

RR actualitad 15:00++