Il HCD sto gudagnar la proxima partida cunter Bienna, uschiglio sa qualifitgescha Bienna per ils mezfinals dals playoffs. Suenter la tschintgavla partida maina Bienna numnadamain la seria cun 3:2.
Sbagls tar il HCD
Il HCD ha fatg grev a sa sez. Gia suenter 26 minutas ha Bienna pudì nudar trais gols. Dus dals trais gols han ils da Tavau survegnì gist suenter temp da chasti. Il team da Arno Del Curto ha gì 33 minutas da chasti durant las emprimas 23 minutas. Gregory Sciaroni ha gia stuì bandunar il stadion avant l'emprima pausa pervia d'in crosscheck. Plinavant è il HCD vegnì chastià pervia da memia blers giugaders sin il glatsch. Magnus Nygren ha fatg il gol tar il 1:3 e Chris Egli tar il 2:4.
Bienna ha persvas sin tutta lingia
Ils hockeyans da Bienna n'han dentant betg be gudagnà pervia dals sbagls dal HCD. Els han persvas sin tutta lingia. Els han pudì far squitsch cun quatter lingias d'assagl. Cunzunt il hockeyan finlandais Toni Rajala ha mussà ina buna prestaziun. El ha fatg ils gols tar il 1:0, 2:0 e 4:0.
Playoffs Liga naziunala A
| 1/4 finals | gieu | seria | |
| Berna | 5:2 | Genevra | 4:1 |
| Zug | 2:3 | ZSC Lions | 1:4 |
| Bienna | 4:2 | Tavau | 3:2 |
| Lugano | 5:3 | Friburg | 4:1 |
RR novitads 23:00