Siglir tar il cuntegn

Naziunal/Internaziunal Il mal il dies fa quitads a Carlo Janka

Carlo Janka patescha danovamain da mal il dies. Il skiunz da Sursaissa sto far ina pausa e ristga uschia era da manchentar l’emprima cursa da la stagiun: il slalom gigant la fin october sin il glatscher da Sölden.

carlo Janka posant per foto
Legenda: Il skiunz svizzer Carlo Janka posant per l'avertura da la stagiun, ch'i n'è betg pli segir, sch'el vegn da far la cursa d'avertura a Sölden. Keystone

Quai n’è betg l’emprima giada ch’il dies fa quitads a Carlo Janka. Gia durant la stagiun 2011/12 aveva el adina puspè stuì cumbatter encunter quests problems. El haja gia sentì la fin da la davosa stagiun il mal il dies, e quai na saja mai propi svanì durant la stad, di Carlo Janka.

Ma propi cumenzà a far mal, uschia ch’el haja stuì sistir ils trenaments, haja quai la fin dal camp da trenament l’avust ad Ushuaia en l’Argentina dal sid, di l'olimpionic dal 2010. Il dies vegn ussa observà, sch'i va per Janka da far part al slalom gigant da Sölden. Avant 1 onn era Janka vegnì a Sölden 11avel ed era uschia stà il meglier skiunz svizzer.

Sportissimo 17:00