Siglir tar il cuntegn

Naziunal/Internaziunal Il pilot da töf da la Moto2 Luis Salom è mort

Il Spagnol da 24 onns ha gì in accident oz en il trenament liber per il Grond premi da la Catalugna. Il pilot da töf è suenter ina operaziun urgenta mort en l’ospital.

Luis Salom
Legenda: Luis Salom è mort suenter in accident en ils trenaments per il Grond premi da la Catalugna. imago

En in storta ha Salom pers la controlla da sia maschina ed è cupitgà grevamain. Il giuven Spagnol da 24 onns è vegnì transportà en l’ospital. Malgrà in operaziun immediata è Salom mort curt suenter.

Ambulanzas ed in helicopter da sanitad sin il percurs da la Catalugna.
Legenda: Ambulanzas ed in helicopter da sanitad sin il percurs da la Catalugna. SRF

Luis Salom è sa participà a 118 grond premis da töf ed ha gudagnà 9 cursas, tuttas en la classa da Moto3. En la classa da Moto2 era Luis Salom il collega d’equipa dal pilot svizzer Jesko Raffin.

Emprima unfrenda mortala dapi il 2011

Salom è tenor statisticas internaziunalas la 48avla unfrenda mortala durant in campiunadi internaziunal da töf dapi il 1949. Il dumber total da pilots da töf ch’èn morts durant cursas è bler pli auts. En la MotoGP è sco ultim Marco Simoncelli morts ils 23 d’october 2011 durant il Grond premi da Sepang.