Showdown oz en Russia. Gartegia a la Svizra da batter la Svezia e scriver istorgia e far il pass en il quart-final dal campiunadi mundial da ballape? La tensiun crescha d’ura ad ura. Co persequitais Vus quai gieu? Faschais liber u telefonais gia a bun'ura al schef e schais che hajas migrena oz?
Balla-Baterlada cun lingia directa en Svezia
Il Radio Rumantsch è il mardi scadin cas Voss radio da ballape. Cun la Balla-Baterlada ch’è tranter auter en contact cun ina famiglia rumantscha en Svezia, ch'è pronta per gudagnar: Per la famiglia engiadinais-svedaisa Ehinger-Martinelli è la partida da quest suentermezdi ina situaziun da «win-win».
Sch’ils Svizzers u ils Svedais gudognan è ad els tuttina – quasi tuttina. Roger Ehinger è numnadamain pilot ed ha sgulà la naziunala svedaisa en Russia tar ils Campiunadis mundials da ballape. Ses souvenir da quel viadi: In shirt cun si tut ils autograms da la squadra svedaisa.
Telefonai er Vus en la Canorta per ina baterlada e laschai esser part da Vossa agitaziun per il gieu Svizra-Svezia.
Ed a partir dal suentermezdi essan en lingia directa cun noss reporter a St. Petersburg e nus visitain era in Public Viewing insanua en il Grischun per udir atmosfera e spectacul.
... e sa chapescha pudais era questa giada gudagnar insatge!
Balla-Baterlada mardi da las 11:00 a las 12:00 uras
Ballape live a partir da las 15:00 uras