Als biatlets svizzers na gartegia l’emprima cursa suenter la pausa da Nadal insumma betg tenor giavisch – tuttina sco la gievgia a las biatletas svizras. Tar il sprint da la cuppa mundiala ad Oberhof en Germania – vegn Benjamin Weger sco meglier Svizzer sin plaz 29.
Almain anc da sa qualifitgar per la persecuziun da sonda gartegia als Svizzers Martin Jäger sco 42avel e Mario Dolder sco 54avel. Vitiers vegn Jeremy Finello sin plaz 68, e Serafin Wiestner da Trin sa ranghescha sin plaz 83.
Victur dal sprint sur 10 kilometers daventa il Russ Alexander Loginov, avant Johannes Thingnes Boe da la Norvegia e Sebastian Samuelsson da la Svezia.
La sonda han lieu ad Oberhof duas cursas da persecuziun, las dunnas partan a las 12:45 ed ils umens a las 15:00.
RR actualitad 17:50