-
Bild 1 von 5. La selecziun canadaisa festegia ses success. Bildquelle: Keystone.
-
Bild 2 von 5. Da vesair live er en il Canada - . en il Canada vegnan persequitadas las prestaziuns dal giugaders canadais a la Cuppa Spengler cun attenziun. Bildquelle: Keystone.
-
Bild 3 von 5. Danovamain nagina victoria per il HC Lugano. Bildquelle: Keystone.
-
Bild 4 von 5. Els èn ils megliers giugaders dal final – . Cory Emmerton (Team Canada) e Dario Bürgler da Lugano (da san.). Bildquelle: Keystone.
-
Bild 5 von 5. La trofea da la 90avla Cuppa Spengler spetga sin il victur. Bildquelle: Keystone.
Duscha fraida per il HC Lugano: Il club tessinais n’ha betg pudì prender revantscha per la terrada da l’onn passà. Las speranzas, ch’ils da Lugano avevan sa fatg suenter la gala da 4:0 encunter il HCD n’han betg s’accumplidas.
Il Team Canada accumplescha ina giada dapli las aspectativas
La cesura è reussida al Team Canada al cumenzament dal segund terz. Entaifer mo 120 secundas han ils Canadais distanzià a Lugano cun ina dubletta da gols. Il 3:1 ha il favurit schizunt realisà en inferiuradad numerica. Il pli tard suenter il 4:1 tras Andrew Ebbett sa cumenzava da mussar il proxim triumf canadais. Ils Canadais han savì ademplir ina giada dapli las aspectativas autas.
Uschia è er l’istorgia da success dal Team Canada a la Cuppa Spengler imposanta: Dapi il 1986 ha il Team Canada cuntanschì 21 giadas il final, gudagnà 85 da 146 partidas e marcà en quellas 604 gols. L’era po cuntinuar il 2017. Il contract cun la centrala a Calgary è vegnì prolungà per almain tschintg onns.
Bianconeri cun pauca energia
Lugano percunter era partì cun la finamira ambiziusa da gudagnar il pli vegl festival da clubs da la scena internaziunala. La fin era dentant la medema sco en ils onns 1991 e 2015 – numnadamain la sconfitta en il final. L’emprima acziun da success – Dario Bürgler marchescha il 1:0 per Lugano suenter 31 secundas – è er restada l’unica per ils tessinais. Emoziuns sco tar la partida encunter il HCD n’haja betg pli dà.
Protagonists principals tar Lugano sco Elvis Merzlinkis, James Wisniewski u Linus Klasen n’èn betg vegnì sin turas. En l’attatga mancavan precisiun ed energia. Cunter ina tscherna da giugaders da la meglra naziun da hockey, numnadamain il Team Canada, n’èsi betg pussaivel da gudagnar uschia.
RR novitads 14:00