Ils misteris da success da Nino Schurter

Il campiun olimpic e campiun mundial da record da mountainbike Nino Schurter ha tradì en il Sportissimo intgins misteris.

Nino Schurter ha realisà la stagiun perfetga. Sco emprim mountainbiker da l’istorgia ha el gudagnà tut las sis cursas da la cuppa mundiala ed ultra da quai ha el era defendì a Cairns en l’Australia ses titel da campiun mundial. Cun sis titels è il mountainbiker da Tersnaus uss campiun mundial da record.

Schurter – il perfecziunist

Talent è ina premissa indispensabla per festivar tants success. Quai è però mo ina part dal misteri da success. Nino Schurter è in perfecziunist e tgira mintga detagl. Quai pertutga en emprima lingia il material. Mintga cursa vegn analisada ed el e sia equipa han emprendì dals sbagls. Perquai è Schurter turnà en 15 onns sulet ina giada senza ina medaglia da campiunadis mundials. Dapi nov onns parta el tar l’elita, avant è el partì quatter onns tar ils U23 ed al cumenzament dus onns tar ils juniors.

La vita è sa midada

En ses 15 onns ch’el parta gia sin livel mundial è sa midà bler. Nino Schurter è sa sviluppà dal grond talent al meglier mountainbiker dal mund. El ha fatg il svilup dal giuvenot senza gronds quitads tar il bab da famiglia ed el è daventà in prominent. Mo en emprima lingia è Schurter restà in mountainbiker passiunà che ha era suenter tants onns anc adina plaschair da ses sport.

RR Sportissimo 17:00