Siglir tar il cuntegn

Header

cuntegn

Naziunal/Internaziunal Ils Penguins elimineschan ils Capitals

Ils Pittsburgh Penguins han cuntanschì ils mezfinals dals playoffs en la National Hockey League. L’equipa da Mark Streit e dal superstar Sidney Crosby ha gudagnà il 7avel gieu ordaifer encunter il victur da la qualificaziun, ils Washington Capitals, cun 2:0 ed uschia decidì la seria cun 4:3.

L’um dal gieu per ils Penguins è stà il goli Marc-André Fleury. Il Canadais da 32 onns che dat gia sia 13avla stagiun cun Pittsburgh ha mussà 29 paradas ed festivà ses emprim shutout en ils playoffs dapi trais onns. Fleury ha astgà giugà sulet en ils playoffs pervia ch’il goli numer 1, Matt Murray ch’è 10 onns pli giuvens, è sa blessà curt avant la fasa da K.o.

Ils gols per ils Pittsburgh Penguins, il defensur dal titel, han sajettà Bryan Rust en la 29avla minuta e Patric Hornqvist en la 45avla minuta.

Per Washington èsi in dira terrada. Ils Capitals avevan pudì egualisar la seria da best of seven suenter ch’ils Penguins eran ids en avantatg cun 3:1. Igl è gia la segunda giada en seria che Washington ha sco victur da la qualificaziun pers en ils quart-finals cunter Pittsburgh. En il mezfinal fruntan ils Pittsburgh Penguins sin ils Ottawa Senators ch’ha battì ils New York Rangers cun 4:2 victorias.

Josi e collegas cunter Anaheim

En l’auter mezfinal vegni tar il duel tranter ils Nashville Predators ed ils Anaheim Ducks. Anaheim ha gudagnà il gieu decisiv encunter ils Edmonton Oilers cun 2:1 ed uschia decidì la seria cun 4:3 victorias. Nashville cun il trio svizzer Roman Josi, Yannick Weber e Kevin Fiala ch’è blessà, cumenza la seria da mezfinal la notg sin sonda cun in gieu ordaifer en la California. Per ils Predators èsi in premiera. L’equipa dal stadi Tennessee n’aveva anc mai cuntanschì fin questa stagiun ils mezfinals en la NHL.

Artitgels legids il pli savens