Siglir tar il cuntegn

Header

Il skiunz grischun Mauro Caviezel.
Legenda: Il skiunz grischun Mauro Caviezel. Keystone
cuntegn

Naziunal/Internaziunal Ils skiunzs spetgan vess sin la naiv

La stad saja bella, ma il pli gugent hajan els simplamain l’enviern. «Lura pudain nus far quai che nus fetschain il pli gugent, ir cun ski», di il skiunz grischun Mauro Caviezel. Per skiunzas e skiunzs da Swiss Ski ha la nova stagiun gia cumenzà il matg, strusch che la veglia stagiun è ida a fin.

Durant ils davos trais mais han ils skiunzs da Swiss Ski oravant tut trenà cundiziun. Malgrà la bell’aura da questa stad han els savens trenà endadens. Dacurt han Mauro Caviezel e collegas dentant gì l’emprima gia contact cun la naiv en la nova stagiun.

Camp da trenament en l'Argentina

Sin il glatscher da Zermatt sin 3'800 meters sur mar, al pe dal Matterhorn, è vegnì fatg tests da material. L’avust suonda lura il proxim camp da trenament sin la naiv en l’Argentina. Sco dapi intgins onns trenescha Swiss Ski ad Ushuaia, il punct il pli en il sid da l’Argentina.

Gia en mira il 2017

La nova stagiun da la cuppa mundiala da skis cumenza sco usità la fin october cun ils slaloms gigants sin il glatscher da Sölden. Skiunzas e skiunzs svizzers han dentant gia en mira il 2017. Lura organisescha San Murezzan il proxim grond eveniment da skis, ils campiunadis mundials. E là, avant ils fans da chasa, vulan ils Svizzers lura propi far furora e gudagnar medaglias.

Artitgels legids il pli savens

Scrollar a sanestra Scrollar a dretga