La mesemna ha l’equipa da Vladimir Petkovic anc absolvì in davos trenament en il camp da basa a Toljatti. Silsuenter èn ils Svizzers sgulads radund 1’800 kilometers direcziun vest. Il sgol da Samara fin a Kaliningrad ha cuzzà bun 3 uras.
Kaliningrad è datiers da la Mar da l'Ost ed è circumdà da la Pologna e da la Lituania. La citad il pli en il vest da la Russia è ina exclava ed ha uschè blers abitants sco la citad da Turitg. Enfin il 1946 tutgeva Kaliningrad tar la Germania. Lura aveva la citad dentant num Königsberg.
Stuì far nagin viadi per quest segund gieu da gruppa ha la Serbia ch’ha ses quartier a Kaliningrad durant quest campiunadis mundials da ballape. Il segund gieu da gruppa dat la Svizra cunter la Serbia il venderdi saira a las 20:00.
RR actualitad 07:00