Ils ZSC Lions n'han betg pudì nizzegiar lur emprim puck da matsch per vegnir per la novavla giada campiun svizzer da hockey sin glatsch. Ils da Turitg han numnadamain pers ordaifer en la Resega cun 0:4 cunter Lugano.
Ils Tessinais han mussà in ferm segn da vita ed uschia scursanì en la seria sin 2:3. Ils gols per il HC Lugano han sajettà Gregory Hofmann (1' e 43'), Philippe Furrer (44') e Luca Fazzini (58').
Als ZSC Lions restan tuttina anc dus pucks da matsch per gudagnar la seria e daventar campiun svizzer. La proxima partida è ils 25 d'avrigl en il Hallenstadion a Turitg.
Ina victoria manca anc
En la qualificaziun da la liga manca a Kloten anc ina victoria per restar en la liga naziunala A. En il playoff han ils Turitgais gudagnà cunter Rapperswil-Jona Lakers cun 4:3 suenter prolungaziun. Cun quai maina l’EHC Kloten la seria cun 3:2. La 6avla partida è glindesdi a chasa tar ils Rapperswil-Jona Lakers.
RR novitads 23:00