Siglir tar il cuntegn

Header

cuntegn

Naziunal/Internaziunal In bel spurt porta Kariem Hussein en il final

Il currider svizzer Kariem Hussein cuntanscha als campiunadis mundials a Londra il final dals 400 meters cun obstachels.

Il Turgovian da 28 onns finescha la cursa en sia seria dal mezfinal en 49,13 secundas. Quai munta il segund plaz, e tanscha per vegnir direct en il final dals megliers otg, che ha lieu mesemna saira. En la cursa d'eliminaziun n’era Hussein betg vegnì sin turas, ed aveva duvrà cletg per vegnir vinavant.

Kariem Hussein ha cumenzà la cursa a moda controllada, ed era l’emprim in pau enavos. Suenter la davosa curva ha il campiun europeic dal 2014 lura dà gas, e la finala è el mo stà in tschientavel davos il victur da quella seria, l’American TJ Holmes.

L'atleta svizra Lea Sprunger
Legenda: Lea Sprunger mussa ina prestaziun suverana en sia cursa a Londra. Keystone

Sprunger e Fontanive vinavant

Da las trais Svizras a la partenza han duas, Lea Sprunger e Petra Fontanive, cuntanschì sur 400 meters cun obstachels ils mezfinals dal campiunadi mundial. Sprunger ha gudagnà sia cursa d'eliminaziun en 55,14 secundas, Fontanive è arrivada sin plazza dus cun in temp da 56,13 secundas.

Crudada ora è percunter la Svizra Yasmin Giger, la giuvna da 17 onns è currida la distanza en 57,72 secundas. La pli sperta da tut las cursas d'eliminaziun è stada l'Americana Dalilah Muhammad, cun 54,59 secundas.

Trais atlets a la fin da lur cursa
Legenda: Alex Wilson (amez) sa bitta en l'arrivada e daventa terz. Keystone

Wilson sa qualifitgescha direct

Cun il temp da 20,54 secundas e plazza trais en sia cursa d'eliminaziun, vegn il Svizzer Alex Wilson direct en ils mezfinals dals 200 meters ch'èn la mesemna. Pli spert ch'il Svizzer da 26 onns èn mo stads Yohan Blake da la Giamaica (20"39) ed Abdul Hakim Sani Brown dal Giapun (20"52).

RR novitads 22:00

Artitgels legids il pli savens