Siglir tar il cuntegn

Header

cuntegn

Naziunal/Internaziunal In onn avant Rio

Ils 5 d’avust 2016 cumenzan a Rio de Janeiro en la Brasilia ils gieus olimpics da stad. Per blers sportists in dals puncts culminants da la carriera, er per blers sportists svizzers.

Als davos gieus olimpics il 2012 a Londra n’è betg ir tut sco giavischà per la delegaziun svizra. Sco finamira aveva Swiss Olympic inditgà 8 fin 10 medaglias. Questa finamiras han atletas ed atlets svizzers manchentà cleramain.

Sulet quatter Svizzers han gudagnà a Londra medaglias. La triatleta Nicola Spirig ed il chavaltgader Steve Guerdat han gudagnà aur, il star da tennis Roger Federer ed il mountainbiker Nino Schurter argient.

Quartet ch’ha gì success a Londra er a Rio buns per medaglia

Las schanzas ch’ils fans svizzers pon er far festa cun ils atlets svizzers a Rio èn bunas. In onn avant ils gieus olimpics è la glista cun atletas ed atlets svizzers cun schanza da medaglia lunga. Sisum questa glista figurescha il quartet ch’ha gia gudagnà ina medaglia a Londra. Spirig, Federer, Schurter e Guerdat audan er en la Brasilia tranter ils gronds favurits.

Numers candidats da medaglia

Tar gronds candidats da medaglia audan dentant er Jolanda Neff che dominescha actualmain las cursas da mountainbike, Stan Wawrinka ch’ha gudagnà ils davos dus onns gist dus grand slams da tennis sco era Fabian Cancellara, il campiun olimpic da Peking il 2008.

Bunas schanzas vegn er dà a la gimnasta Giulia Steingruber, al team da spada enturn Max Heinzer e Fabian Kauter sco er als rembladers Simon Schürch, Mario Gyr, Lucas Tramèr e Simon Niepmann

Artitgels legids il pli savens