Siglir tar il cuntegn
cuntegn

Naziunal/Internaziunal In sco nagin – Arno Del Curto ed il HCD

Ina ruttadira dal ravel aveva mess ina fin al giugader da hockey activ Arno Del Curto. El giugava tar il ZSC en la liga naziunala B. En la vegliadetgna da 21 onns è ida a fin sia carriera sin il glatsch – ma quella giada ha cumenzà sia carriera pir da dretg.

Arno Del Curto (62) ha marcà il Club da Hockey da Tavau sco strusch ina persunalitad avant el. Quai n'haja el betg be fatg sin il livel sportiv, ma er sin quel uman, scriva il HCD en sia communicaziun a las medias da questa bun'ura a las 10:30. Quai haja el fatg «sco gronda persunalitad: Pretensius e promovend, dentant er protegind e gidaivel».

In sguard sin la carriera dad Arno Del Curto:

1992 – success sco trenader cun il ZSC

Sia carriera sin il glatsch finescha tar il ZSC – sia carriera a la banda cumenza là. Suenter ina u l'autra storta tar in u l'auter club cumpara Arno Del Curto il 1991 sco trenader puspè tar il ZSC. Gia l’emprima stagiun finescha el cun in success: Il ZSC gudogna il quart final en il playoff cunter Lugano.

1996 – in’era cumenza

Il 1996 suttascriva l’Engiadinais Arno Del Curto sco trenader tar il HCD. A Tavau responsescha el in’istorgia da success:

  • 6 x campiun svizzer – 2002, 2005, 2007, 2009, 2011, 2015
  • 5 x campiun da Cuppa Spengler – 2000, 2001, 2004, 2006, 2011
  • 2015/16 mez-final da la Champions Hockey League

2018 – il turbo stagnescha

En la 23avla stagiun cun Arno Del Curto sco trenader stagneschia il turbo – quai scriva il HCD sez en sia communicaziun a las medias dad oz mardi. Il HCD è en ina da sias pli grevas crisas insumma: En 21 gieus ha el realisà be 20 puncts.

Sper la communicaziun da la demissiun da Del Curto sin la pagina dal HCD en la rait stà la rangaziun actuala da la «National League»: Tavau è sin plazza 11 da 12. L'emprima giada dapi il 1993 saja da temair, ch'il HCD vegnia betg en ils play-offs, scriva il HCD.

27 da november 2018 – la demissiun

La Svizra da hockey sa dumandava gia curt suenter il cumenzament da la stagiun, cura ch'il trenader Arno Del Curto sa retiria. Anc il cumenzament d'october na veseva il president Gaudenz Domenig tuttina nagin motiv da dubitar vi dad Arno Del Curto sco trenader u sco schef da sport.

Uss ha Arno Del Curto sez procurà per la surpraisa ed ha tratg il stritg. Questa bun'ura a las 10:30 ha il HCD annunzià la demissiun dad Arno del Curto. L'ultima impressiun restia, schess in proverbi – dentant:

Betg uschia tar Arno. Ils blers gieus magics e las notgs, ils mais ed ils onns ch'el ans ha regalà cun il HCD, restan nunemblidaivels.
Autur: annunzia a las medias 10:30HCD

Ils schefs dal club sperian uss «da chattar cun in nov trenader ord il bass».

Legenda: Guardar il video Adia Arno!. Durada 03:16 minutas.
Or da Nouvo RTR dals 27.11.2018.

RR novitads 11:00++