Tschients uras da ballape pon ils fans puspè consumar questa stad a la televisiun. SRF mussa tut ils 64 gieus dals campiunadis mundials en Russia. Mintga gol vegn mussà ord numerusas perspectivas e vegn repetì e repetì. Vitiers vegnan rundas da discussiun, analisas d’experts e documentaziuns davart la terra ospitanta. Dals stars datti intervistas ed oravant tut bleras flosclas. Mo propi co els èn e tge ch’els pensan zuppentan ils giugaders il pli savens. Fin da qua è quai è sta uschia tar ils trais frars Rodriguez. Mo ussa han els raquintà a l’autur Thomas Renggli lur istorgia da la vita, ina istorgia che muventa.
Trais frars, ina famiglia
Il cudesch «Roberto, Ricardo, Francisco Rodriguez - Drei Brüder - eine Familie», è ina biografia davart ils trais frars Rodriguez ch'èn tuts trais profis da ballape. Il pli enconuschent dad els è Ricardo Rodriguez da l'AC Milan, il giugader naziunal svizzer ch'è en sasez la culpa che la Svizra dat insumma als campiunadis mundials en Russia. En ils gieus da la «barrage» cunter l'Irlanda dal Nord ha Ricardo Rodriguez sajettà il sulet gol, quai penalti ch'ha muntà che la Svizra è sa qualifitgada.
Dapli che mo l’istorgia da gols impurtants
Ina biografia da ballapedists è savens in'enumeraziun da gols e gieus impurtants. La biografia dals trais frars Rodriguez è autra. Ella cumbinescha singulas istorgias dal ballape cun l’istorgia da la famiglia. Quai èn raquints persunals da lur uffanza modesta en in quartier multicultural a Turitg. Igl è l’istorgia da lur bab José ch'è oriunds da la Spagna e da lur mamma Marcela che deriva dal Chile ed è morta bler memia giuvna dal cancer. En memoria da lur mamma dattan ils trais frars cun il numer 68, l’annada da lur mamma. Il giuven Francisco dat tar Lucerna, il mesaun Ricardo tar l’AC Milan ed il vegl Roberto tar il FCZ.
Els han adina gì da cumbatter
La famiglia Rodriguez ha adina gì da cumbatter. Roberto auda mal e Ricardo fiss bunamain mort sco uffant pitschen. Mo era grazia a lur amur per il ballape han ils trais frars dumagnà tut ils problems. Lur ragischs han els dentant mai emblidà. Almain ina giada ad onn turnan els en la canorta da la scola ad Auzelg a l’ur da Turitg, nua ch’els han passentà lur uffanza.
Roberto, Ricardo, Francisco Rodriguez – Drei Brüder, eine Familie
RR Sportissimo 17:00