Fin al campiunadi mundial da ballape 2026 vul il president da la FIFA, Gianni Infantino, che 48 equipas possian far part a la runda finala. Tar sia candidatura per il presidi da la FIFA aveva Infantino anc annunzià d’augmentar il dumber dals participants al campiunadi mundial da 32 a 40 equipas.
Il modus 32+16
Tenor il nov model dad Infantino giugassan 32 equipas en ina runda da playoff. Ils 16 victurs duessan lura esser qualifitgads per la fasa da gruppa dal campiunadi mundial e giugar là cunter 16 equipas ch'èn gia nominadas. Suenter continuass il model sco ussa cun gieus da gruppa e fasa da k.o.
Dapli gieus = Dapli entradas
Uschia dess quai total 80 enstagl da 64 partidas al campiunadi mundial. Quai muntassia era che la FIFA pudess augmentar las entradas tras ils dretgs d'emetter ils gieus a la televisiun.
Tge format ch’il futur campiunadi mundial vegn ad avair devinitivamain, decida il cussegl da la FIFA il schaner dal 2017.
RR novitads 09:00