Siglir tar il cuntegn
cuntegn

Naziunal/Internaziunal IOC da nov senza Gian-Franco Kasper

18 onns ha il Grischun da 74 onns fatg part dal Comité olimpic internaziunal. Grazia ad ina lubientscha speziala avev’el pudì restar en il gremi ils davos quatter onns, malgrà ina limita da vegliadetgna da 70 onns. Uss sto Gian-Franco Kasper definitiv bandunar l’IOC.

Il Grischun Gian-Franco Kasper.
Legenda: Gian-Franco Kasper avant var in onn durant ina seduta da l’IOC a Losanna. Reuters

Dapi l'onn 2000 è Gian-Franco Kasper stà commember en l'IOC. Davent dad immediat è el commember d’onur senza dretg da vuschar. Pir avant paucs mais – aveva la Federaziun internaziunala da skis FIS reelegì Kasper per la sisavla giada sco president.

IOC cun plirs Svizzers

Al gremi dal Comité olimpic internaziunal fan actualmain part trais Svizzers: Patrick Baumann (secretari general dals ballabasketists), René Fasel (president da l'Associaziun mundiala dal hockey sin glatsch) e Denis Oswald (anteriur president dals rembladers).

Senza duas grondas federaziuns

Vinavant nagin sez en il Comité olimpic internaziunal han il president da la FIFA, Gianni Infantino, ed il schef da l'atletica leva, Sebastian Coe. Ils top-funcziunaris eran quasi automaticamain commembers da l'IOC, avant ch'igl ha cumenzà tar las duas federaziuns mundialas dal ballape e da l'atletica leva cun scandals da corrupziun e da doping.

RR novitads 20:00