Naziunal/Internaziunal - Jan van Berkel gudogna l'Ironman Switzerland
Cun otg uras e nov minutas è il triatlet da Bülach stà il pli spert a la cursa enturn il batschigl dal lai da Turitg. Cun in retard da passa quatter minutas è il Sloven David Plese daventà segund. Terz è vegnì l'Australian Cameron Wurf.
Per van Berkel èsi l'emprima victoria a Turitg suenter ch'el è stà duas giadas terz e duas giadas segund. Dus ulteriurs Svizzers èn sut ils top 10, Ronnie Schildknecht sco tschintgavel e Sven Riederer sco setavel.
Tar las dunnas ha gudagnà la Finnlandaisa Kaisa Sal. Segunda è daventada Sky Moench dals Stadis Unids e terza Annabel Luxford da l'Australia. Cun bun 25 minutas retard è la Svizra Nina Derron daventada sisavla.
