Il podest
- 1. Kjetil Jansrud (NOR) 1:41,38
- 2. Dominik Paris (ITA) + 0,20
- 3. Steven Nyman (USA) + 0,41
Ina giada dapli gudogna in Norvegiais ina cursa rapida en questa stagiun. Quai è gia la 6avla victoria norvegiaisa en la 8avla cursa. Per Jansrud è quai dentant sia emprima victoria en ina cursa rapida questa stagiun. Aksel Svindal ha gudagnà quatter giadas ed Aleksander Kilde ha gudagnà la davosa cursa avant in’emna a Garmisch. Oz ha Kilde dentant gia suenter paucas secundas pers in ski e n'è betg rivà en l’arrivada. El na'ha betg sa fatg mal.
Test da la nova pista gartegiada
Jansrud aveva gia en ils trenaments sin la nova pista a Jeongseon mussà las meglras prestaziuns. La pista è vegnida fabritgada per ils gieus olimpics 2018 en la Corea dal Sid. Cun questa cursa ha la nova pista pia dumagnà l'emprim grond test. La pista ch'è vegnida fabritgada da Bernhard Russi è avant la cursa vegnida crititgada sco memia simpla e memia plauna per ina cursa rapida. Il Svizzer na vuleva dentant betg laschar valair quellas criticas. Quels che hajan reclamà, hajan la fin finala era gì las pli grondas difficultads cun la pista, uschia Russi.
Buna prestaziun dals svizzers
Gist quatter svizzers en ils top 15 tar la cursa da la Corea dal Sid.
- 5. Beat Feuz +0,49
- 7. Carlo Janka +0,58
- 13. Ralph Weber +0,89
- 14. Marc Gisin +0,92