Siglir tar il cuntegn

Header

cuntegn

Naziunal/Internaziunal KalPa Kuopio gudogna la Cuppa Spengler

Surpraisuna a la Cuppa Spengler: KalPa Kuopio, ils newcomers finlandais, gudognan cunter il defensur dal titel, il Team Canada. Igl è stà in final ch'ha fatg glischar ils egls da mintga fan da hockey: Attractiv er cun paucs gols fin a la fin dramatica cun prolungaziun e penaltis

Cun KalPa Kuopio gudogna per l’emprima giada insumma en l’istorgia dal turnier ina squadra finlandaisa la Cuppa Spengler. Ina squadra giuvna, che ha giugà cun tempo e cor, che n’ha betg dà si cunter in Team Canada, che ha medemamain giugà in turnier ferm.

Il gieu Team Canada vs. KalPa Kuopio

Cun il Team Canada ha giugà il defensur dal titel cunter ils novizs finlandais da KalPa Kuopio. Ina cumbinaziun che laschava sminar, ch'ils Canadais van er questa giada cun la cuppa – ma gia il cumenzament dal gieu ha mussà ch'i na vegn betg simpel:

  • L’emprim terz ha cumenzà immediat cun squitsch dals Canadais: direct e svelt davant il gol finlandais, senza saramonas. En il decurs da las emprimas 20 minutas ha quai dentant sa mussà, ch'il bun gieu dals Canadais na sa mussa betg sin la tabella: Als Finlandais èsi gartegià dad evitar in gol canadais – l'emprim terz finescha cun 0:0.
  • Il segund terz terminescha sco quai ch’el ha cumenzà – cun 0:0. Il resultat na mussa dentant betg l’intensitad dal gieu. Igl è in gieu attractiv cun schanzas da tuttas duas varts: 22 tuns sin il gol dal Team Canada, 13 da KalPa Kuopio. La dominanza dal Team Canada n’ha però betg tanschì per in gol.
  • En il terz terz, suenter 45 minutas da gieu final e 28 tuns sin il gol da KalPa Kuopio, gartegia finalmain a Winnik dal Team Canada da far il 1:0. Dentant: Tar 51' fa Luostarinen il 1:1 per KalPa.
  • Il final da la 92avla Cuppa Spengler va en la prolungaziun: Tschintg minutas trais giugaders cunter trais giugaders – nagina decisiun. La cuppa vegn decisa cun sajettar penaltis. Suenter otg penaltis han ils Finlandais da KalPa Kuopio decis il final per sai.

KalPa Kuopio conferma er en il final tar lur emprima cumparsa a la Cuppa Spengler ch'els èn in adversari ch'èn da prender serius. La squadra finlandaisa ha persvadì a la Cuppa Spengler 2018 cun hockey spert ed attractiv, precis tenor il gust da public.

Ils finalists: KalPa Kuopio da la Finlanda ...

Ch'il quint n'è betg be ì si per il public ed ils organisaturs da la Cuppa Spengler mussa la bilantscha sportiva dals Finlandais: Els han gudagnà tut ils trais gieus fin en il final – l'ultim ier saira cun bittar l'osp HCD or da ses turnier da chasa.

Els sin il glatsch.
Legenda: KalPa Kuopio suenter la victoria cunter il HCD (en nair, al final en mellen). Keystone

Uschia ha la giuvna squadra gia savì nudar tar lur emprima cumparsa al turnier da tradiziun a Tavau in’ulteriura premiera – en l’istorgia da 92 onns Cuppa Spengler è KalPa Kuopio l’emprima squadra finlandaisa che gioga in final.

... ed il Team Canada

Il Team Canada ha persvadì ina giada dapli a la Cuppa Spengler. Ch’ils victurs da l’ultima ediziun da la cuppa defendan lur titel en il final 2018 n’è betg pli ina surpraisa. Er els han gudagnà lur trais gieus per vegnir en il final da maniera suverana.

Tuts ensemen sin il glatsch en posa.
Legenda: Il Team Canada 2018. Keystone

oSch’ils Canadais gudognan quest final fiss quai betg be lur quarta victoria en seria ma er lur 16avla victoria dal turnier – e cun quai fiss il Team Canada quel team, che ha gudagnà las pli bleras Cuppas Spengler insumma.

RR novitads 12:00 / emissiun live 12:05+

Artitgels legids il pli savens