Siglir tar il cuntegn
Inhalt

Naziunal/Internaziunal Klaus Allofs – dal caposajettagols al manager dal VfL Wolfsburg

Diego Benaglio e Ricardo Rodriguez èn dus dals stars ch’èn actualmain cun il VfL Wolfsburg en il camp da trenament a Bogn Ragaz. Quel ch’ha dentant gudagnà ils pli blers titels è il mainafatschenta e schef da sport Klaus Allofs, in anteriur campiun d’Europa e caposettagols da la Bundesliga.

klaus allofs rient
Legenda: Klaus Allofs ha bel rir: Dal caposajettagols al manager dal VfL Wolfsburg. Keystone

Allofs vul puspè manar Wolfsburg en ils top 4

Campiun tudestg 2009, vicecampiun e victur da la cuppa tudestga 2015. Quai èn ils pli impurtants success dal VfL Wolfsburg dals ultims onns. En la stagiun passada è Wolfsburg dentant mo vegnì 8avel en la Bundesliga. Persuenter ha Wolfsburg cuntanschì il quartfinal da la Champions League ed ha battì sco suletta equipa Real Madrid ch’ha gudagnà pli tard la pli impurtanta concurrenza per clubs da l’Europa.

Las proximas stagiuns vul Klaus Allofs puspè far in pass enavant. Wolfsburg duai s’etablir en ils top 4 da la Germania ed uschia dar permanentamain en la Champions League.

La rolla dals svizzers Benaglio e Rodriguez en il VfL

benaglio cun far autograms
Legenda: L'anteriur goli da la naziunala svizra, Diego Benaglio, tar la tgira dals fans. Keystone

Il goli e capitani Diego Benaglio ed il defensur Ricardo Rodriguez han giugà ils ultims onns ina rolla impurtanta tar il VfL Wolfsburg.

Tar Ricardo Rodriguez ha quai adina puspè dà dà famas e speculaziuns ch’el vegnia a bandunar il VfL Wolfsburg. Stan actual saja dentant ch’el haja in contract fin il 2019. Klaus Allofs quinta perquai era en l’avegnir cun Rodriguez.

rodriguez cun bal en cumbat
Legenda: Il giugader da la naziunala svizra Ricardo Rodriguez en il trenament dal VfL Wolfsburg a Bogn Ragaz. Keystone

Onns ora il numer 1 è il goli Diego Benaglio stà. Ina garanzia da restar il numer 1 n’haja Benaglio dentant betg. Els hajan trais buns golis, mo tenor Allofs haja Benaglio la classa da gudignar il cumbat per il numer 1.

RR Sportissimo 17:00