L'agentura anti-doping russa resta suspendida

Avant dus onns aveva l'agentura dad anti-doping globala (WADA) bloccà l’agentura d'anti-doping russa (RUSADA). Cunquai che lezza n'ademplescha anc adina betg las cundiziuns fatgas avant dus onns, na vul la WADA betg abolir la bloccada. Quai ha ella communitgà la gievgia a Seoul.

Logo da la RUSADA Bild in Lightbox öffnen.

Legenda da maletgs: La RUSADA resta bloccada. Keystone

Avant dus onns aveva la WADA suspendì la RUSADA perquai ch'els avevan chattà mussaments per doping ch'era vegnì organisà dal stadi. Pli tard ha l'investigader Richard McLaren cumprovà il suspect, ch'il labor haja sfalsifitgà provas da doping durant ils gieus olimpics.

Star tar ses sbagls

Tenor la WADA mancan anc adina duas premissas per abolir la suspendida. Numnadamain avess la RUSADA da renconuscher ils resultats da l'examinaziun McLaren, sco era da confessar d'avair profità d'in sistem da doping per tut il territori. Plinavant pretendan els era access ad ulteriuras provas da doping en il labor da Moskau.

Il schef russ dal comité naziunal olimpic ha dentant commentà en in'emprima reacziun, ch'els refusian in sistem da doping statal. Uschia na vegnia betg en dumonda d'acceptar il rapport da McLaren.

RR novitads 09:00