Siglir tar il cuntegn

Header

cuntegn

Naziunal/Internaziunal L’elita dal sport da passlung è puspè en Val Müstair

En la patria da Dario Cologna sa mesira l’elita dal sport da passlung tar in sprint dal Tour de ski. Il sprint è la terza da totalmain set etappas da la cursa da quest on.

Dapi il 2013 sa duelleschan las meglras passlunghistas ed il megliers passlunghists adina puspè tar in sprint dal Tour de ski en Val Müstair. En la patria dal matador local Dario Cologna vai puspè per secundas ed ina buna plazza. Tgi sa, forza po Dario Cologna metter er questa giada puspè la basa per ina ulteriura victoria da la seria da cursas en sia patria.

Cologna è il magnet – favurits èn dentant auters

Segir attira il matador local Dario Cologna las massas tar l’etappa da sprint dal Tour de ski en la Val Müstair. Ils organisaturs spetgan passa 5’000 visitaders tar la cursa che ha lieu al pe dal Piz Daint. Anc mai n'ha dentant ina atleta u in atlet Svizzer savì triumfar tar il sprint en Val Müstair. Tar tut las ediziuns enfin qua eran auters pli sperts.

Premiera per il nov president dal comité d’organisaziun

Dapi il schaner è Guido Mittner il nov president dal comité d’organisaziun da l’etappa dal Tour de ski en Val Müstair. L’ediziun da quest onn è sia premiera en questa funcziun. Las emprimas lavurs dal nov president a la testa da l’etappa en Val Müstair era da chattar gidanters per organisar l’etappa a Tschierv.

audio
Guido Mittner avant Tour de ski en Val Müstair
ord Actualitad dals 31.12.2018.
laschar ir. Durada: 3 minutas 16 Secundas.

Cun quella dumonda sclerida hajan ins savì cumenzar da lavurar. Uss è tut pront. L’infrastructura è gia daditg installada. Uss ston mo pli las atletas ed ils atlets procurar per spectacul sin la loipa.

RR actualitad 17:40

Artitgels legids il pli savens