Gia suenter tschintg minutas aveva Kieran Trippier sajettà il 1:0 per ils Englais. Als Croats èsi dentant reussì dad egualisar la partida entras in gol da Ivan Perišić en la 68avla minuta. Cunquai ch'ì ha dà nagin victur suenter il temp regular, ha la prolungaziun stuì decider. En la 109avla minuta ha alura Mario Mandžukić sajettà il gol decisiv.
Final Frantscha - Croazia
Per l'emprima giada en l'istorgia frunta la Frantscha sin la Croazia en il final. Ils Franzos han battì mardi saira la Belgia cun 1:0. Per la Frantscha èsi gia la terza giada ch'ella cuntanscha il final; per ils Croats è quai dentant in novum. Il gieu cumenza dumengia suentermezdi a las 17:00.
«Final pitschen» Engalterra - Belgia
Per ils Englais n'è il viadi al campiunadi mundial anc betg a la fin. Els giogan sonda da las 16:00 cunter la Belgia per il terz plaz da quest campiunadi mundial da ballape.
RR Novitads 23:00