Siglir tar il cuntegn

Header

audio
Nagin campiunadi mundial da hockey en Svizra – i restan anc dumondas
Or da Sportissimo dals 21.03.2020.
laschar ir. Durada: 02:52 minutas.
cuntegn

La IIHF ha decidì Nagin campiunadi mundial da hockey en Svizra

Quai che era da quintar è uss uffizial. Il coronavirus sforza era la Federaziun internaziunala da hockey da desister sin il campiunadi mundial.

L'annulaziun dal campiundi mundial da hockey en Svizra n'è nagina surpraisa. Ma la decisiun è istorica. Igl è l'emprima giada dapi la segunda guerra mundiala ch'i na dat nagina WM. Sche la Svizra dastga prender suenter il campiunadi l'auter onn è intschert. Quai stoppia il congress discutar e decider, scriva la Federaziun internaziunala da hockey IIHF.

Quai è dir, ma la famiglia dal hockey sto acceptar.
Autur: René FaselPresident da la IIHF

Enfin l'onn 2025 èn ils campiunadis mundials gia surdads. L'onn che vegn fissan Minsk e Riga en roda, 2022 Tampere e Helsinki, 2023 St. Petersburg, 2024 Prag ed Ostrava, 2025 Danemarc e Svezia. Tut quels organisaturs han contracts differents. Tuts stuessan acceptar da spustar lur WM per in onn. Dentant sto era la decisiun dal congress da la Federaziun internaziunala spetgar. Quel avess gì lieu la fin da matg a Turitg ed è era spustà.

Ils 8 da matg fiss la gronda festa da hockey vegnida lantschada cun ils emprims gieus a Losanna ed a Turitg. Passa 300'000 bigliets vendids. La Federaziun vul sclerir e communitgar tant pli svelt tge che succeda cun ils bigliets.

Nagin'autra via

En Svizra è la trumpada gronda, ma era la chapientscha ch'i na dat nagina autra via. La sanadad da la carstgaunadad haja prioritad. Era Gian Gilli, il CEO dal comité d'organisaziun da la WM en Svizra, sto acceptar. Suenter avair lavurà quatter onns per preparar ed organisar il spitachel da hockey, saja la trumpada gronda. Suenter emnas intschertas saja uss almain bun d'avair la decisiun definitiva, uschia Gian Gilli.

RTR Sportissimo 17:00

RTR novitads 16:00

Artitgels legids il pli savens

Scrollar a sanestra Scrollar a dretga