Siglir tar il cuntegn

Naziunal/Internaziunal La Svizra è sa qualifitgada per ils campiunadis mundials 2018

Il pari da 0:0 cunter l’Irlanda dal Nord ha tanschì per il ticket en Russia.

Il trenader Vladimir Petkovic ha tramess ils medems 11 giugaders sin la plazza da ballape sco en l’emprim gieu a Belfast. Ils giugaders e fans han duvrà bunas gnervas durant il gieu decisiv da l’equipa naziunala en il St. Jakob Park a Basilea. En l’emprima mesadad dal gieu n’èsi betg gartegià a l’equipa da Petkovic da nizzegiar las bleras schanzas ch’ella ha gì ed en il temp supplementar ha Rodriguez pudì evitar be per il nair da l’ungla in gol dals adversaris.

Per la quarta giada en seria da la partida

Suenter la victoria ordaifer a Belfast dad 1:0 ha però tanschì in pari per sa qualifitgar per il campiunadi mundial en Russia. La Svizra è per la 4. giada en seria da la partida ad in campiunadi mundial da ballape.

Cunter tgi che la Svizra dat lura al campiunadi mundial vegn ora il prim da december a Moscau cura che las gruppas vegnan tratgas ora.

Betg mo il gieu è stà burascus

Da cumbatter n’han ils giugaders betg mo gì cun l’adversari ma era cun las cundiziuns. A Basilea pluveva ferm durant il gieu ed il pastget era tras quai fitg bletsch.

RR novitads 20:00