En il mezfinal è Ladina Jenny crudada ora cunter la Tudestga Selina Jörg che daventa pli tard campiunessa mundiala. En il final pitschen vegn ella dentant da batter la Russa Milena Bykowa ed uschia tuttina anc far il pass sin il podest.
Fin en ils quartfinals è era arrivà Dario Caviezel da Cuira – là è il Tudestg Stefan Baumeister dentant stà pli spert. Campiun mundial tar ils umens daventa la finala il Russ Dmitry Loginov.
Nevin Galmarini gia out en la qualificaziun
L’Engiadinais Nevin Galmarini ha gì en l’emprim percurs da qualificaziun dal slalom gigant parallel in ferm retard. E cun vulair curreger quai en il segund percurs ha el fatg in sbagl ed è vegnì disqualifitgà. Il campiun olimpic da Pyeongchang ha uschia stuì magunar ina dira terrada en sia disciplina da parada.
Era la portasperanza svizra Julie Zogg n’ha betg dumagnà la qualificaziun a Park City. Patrizia Kummer è vegnida enavant, dentant crudada ora en ils otgavelfinals. La situaziun cun blera naiv nova è stada per tut ils atlets e tut las atletas ina gronda sfida tar questa concurrenza.
RR novitads 23:00
