Tut en tut represchentan 57 atletas ed atlets La Svizra al campiunadi mundial da mountainbike 2018 a Lai. Plirs dad els valan sco gronds candidats da medaglia.
Gia l'emprim di dal campiunadi mundial a Lai tutga la Svizra tar il grond favurit, quai en la cursa da team, nua che mintga equipa va cun tschintg atlets a la partenza. L'equipa svizra, tranter auter cun Nino Schurter, vul defender en questa cursa il titel gudagnà avant in onn a Cairns en l'Australia.
Betg sulet tar ils atlets svizzers d'elita, mabain era tar ils pli giuvens tutga la Svizra tar las top-naziuns. Tar la cursa da dunnas U23 è Sina Frei la gronda favurita. Tar la cursa dals umens U23 dastgan ins, tranter auter, esser spanegià sin la prestaziun dal Lumnezian Vital Albin.
Betg tar ils favurits tutga la Svizra en il downhill. Ina medaglia en questas cursas fiss ina surpraisa.
Esser vinavant la naziun da mountainbike dominanta
Al campiunadi mundial avant in onn a Cairns en l'Australia ha la Svizra gudagnà otg medaglias, tranter quellas quatter dad aur. Tenor il schef da sport da Swiss Cycling, Thomas Peter, fissan els dentant era cuntent cun tschintg fin sis medaglias quest onn a Lai.
Cun tschintg u sis medaglias fissan nus fitg cuntents
Tar in campiunadi mundial a chasa saja il squitsch tut in auter, declera Thomas Peter. Durant ils tschintg dis da cursa vegnan spetgads a lai radund 30'000 aspectaturs.
Program dal campiunadi mundial a Lai
Mesemna, 5 da settember:
17:30-18:45: Cursa da team Cross-Country
Gievgia, 6 da settember:
14:00-15:30: Dunnas U19 Cross-Country
16:30-18:00: Umens U19 Cross-Country
Venderdi, 7 da settember:
14:30-15:45: Dunnas U23 Cross-Country
16:30-17:45: Umens U23 Cross-Country
Sonda, 8 da settember:
12:30-14:00: Dunnas elita Cross-Country
15:30-17:00: Umens elita Cross-Country
Dumengia, 9 da settember:
9:30-10:00: Dunnas U19 Downhill
10:15-11:00: Umens U19 Downhill
13:00-14:00: Dunnas elita Downhill
14:30-16:45: Umens elita Downhill