Siglir tar il cuntegn

Lai 2018 Team Relay cun Nino Schurter

Emprima cursa, emprima schanza da medaglia per Nino Schurter. Ensemen cun ses collegas d’equipa vul il mountainbiker da Tersnaus defender ses titel en la cursa da staffetta, il uschè numnà Team Relay.

Nino Schurter, Jolanda Neff, Alexandre Balmer, Filippo Colombo e Sina Frei
Legenda: Nino Schurter, Jolanda Neff, Alexandre Balmer, Filippo Colomo e Sina Frei vulan procurar per l'emprima medaglia svizra al campiunadi mundial da mountainbike a Lai. Keystone

Sco gia al davos campiunadi mundial avant in onn a Cairns en l’Australia trametta Swiss Cycling er quest onn la meglra equipa pussibla a la partenza. Per la Svizra partan sper Nino Schuter (elita umens) er Jolanda Neff (elita dunnas), Sina Frei (dunnas U23), Filippo Colombo (umens U23) ed Alexandre Balmer (umens U19).

La Svizra è il grond favurit

L’equipa svizra vala sco il grond favurit sin il titel en il Team Relay. Cun Nino Schurter, Jolanda Neff e Sina Frei ha igl ensemble svizzer gist trais campiuns mundials en lur team, trais atlets ch’han er gudagnà quest onn la cuppa mundiala generala en lur categoria. Il grond adversari vegn ad esser la Frantscha, sco gia als davos campiunadis mundials.

Malgrà che Nino Schurter ha mess tut il focus sin la cursa d’elita da la sonda, è el tuttina sa decidì da sa participar al Team Event, ina gia per defender il titel avant ils fans da chasa, e per l’autra pudess el tancar morala e confidenza tar in success per il punct culminant trais dis pli tard.