Gudagnar ina medaglia fiss ina sensaziun, Albin spera dentant d’almain cuntanscher in plaz sut ils top 20 suenter che la stagiun 2018 n’è betg gartegiada sco giavischà.
Vital Albin è dapi l’entschatta da l’emna a Lai. Ils davos dis ha el uschia pudì trenar e sa preparar optimal sin la pli impurtanta cursa da la stagiun. Impurtant saja dentant er stà da sa ruassar bain quels dis, tancar energia, magliar bain per uschia propi pudair ir top fit a la partenza.
Jau hai emprendì d’enconuscher ils davos dis mintga ragisch sin il traject da cursa.
La cursa dal campiunadi mundial a Lai è tecnicamain betg la pli pretensiusa. I saja dentant ina cursa cun bleras ragischs ed ina cursa nua ch’ins possia mai propi sa revegnir, di il mountainbiker da Tersnaus ch’ha er survegnì in nov bike per questa cursa da chasa.
La cursa da cross-country dals U23 al campiunadi mundial a Lai è il venderdi, ils 7 da settember, a las 16:30. Il Radio Rumantsch rapporta live.
TR Telesguard